З прывітальнымі словамі выступілі дырэктар архіва-музея Алена Аляксандраўна Макаранка і дырэктар мемарыяльнага музея Ірына Уладзіміраўна Мацяс.
Трэці выпуск Даведніка БДАМЛМ раскрывае змест і склад фондаў архіва-музея, якія паступілі і прайшлі навуковую апрацоўку ў 2010—2021 гг. Аб працы над ім распавялі аўтары-ўкладальнікі, ганаровыя архівісты Беларусі — Ганна Вячаславаўна Запартыка і Валянціна Ягораўна Данекіна.
Каталагізацыя музейных прадметаў — складаная праца ў сучаснай музейнай дзейнасці. Гэта немалаважны крок навуковага апісання калекцыі кніг з прысвячэннямі паэта, што беражліва захоўваюцца ў фондах музея Якуба Коласа. Аб гэтым распавяла галоўны захавальнік фондаў музея Васіліна Валер’евна Міцкевіч.
Прафесар кафедры крыніцазнаўства гістарычнага факультэта Беларускага дзяржаўнага ўніверсітэта Міхаіл Фёдаравіч Шумейка яшчэ раз падкрэсліў значнасць працы архіўных устаноў па стварэнні анатаваных даведнікаў, а таксама супрацоўніцтва, якое наладжана паміж архіўнымі, музейнымі і бібліятэчнымі ўстановамі.