З прывітальным словам да ўзбекскіх калег звярнулася дырэктар БДАМЛМ А.А.Макаранка. У сваім выступленні яна падрабязна ахарактарызавала ключавыя напрамкі дзейнасці ўстановы, надаўшы асаблівую ўвагу навукова-выдавецкай і публікацыйнай рабоце архіва-музея, а таксама прэзентавала ўнікальныя кніжныя выданні, падрыхтаваныя на аснове найбагацейшых архіўных крыніц.
У рамках праграмы візіту вядучы архівіст Т.В.Кекелева прадставіла спецыяльна падрыхтаваную дакументальную выставу “Шчырае сяброўства”, экспанаты якой наглядна адлюстроўваюць багатую гісторыю беларуска-ўзбекскіх літаратурных і культурных сувязяў.
Яркім і кранальным акцэнтам сустрэчы стала прэзентацыя дакументаў з асабістага фонду вядомага архітэктара, заслужанага архітэктара БССР Леаніда Левіна. Прэзентацыю правяла яго дачка – Г.Л.Левіна. Яна распавяла аб глыбокай творчай і асабістай сувязі свайго бацькі з Узбекістанам, дзе ён неаднаразова бываў, натхняўся мясцовай культурай і ствараў архітэктурныя праекты, што пасля знайшло цёплае адлюстраванне ў яго мемуарах. Гасцям былі прадэманстраваны не толькі каштоўныя дакументальныя крыніцы, але і ўнікальныя аўтэнтычныя рэчы з сямейнай калекцыі: гліняныя цацкі ручной работы, традыцыйныя табакеркі з высушаных гарбузоў, а таксама элементы ўзбекскага нацыянальнага адзення, прывезеныя Л.Левіным з паездак.
У канцы сустрэчы адбыўся традыцыйны абмен памятнымі падарункамі. Візіт дэлегацыі агенцтва “Узархіў” прайшоў у атмасферы шчырай прафесійнай цікавасці. Мерапрыемства стала важным крокам ва ўмацаванні міжнародных архіўных сувязяў і развіцці двухбаковага культурнага дыялогу паміж рэспублікамі Беларусь і Узбекістан.
